TÜRKMENABADYŇ MUGALLYMÇYLYK INSTITUTY 70 ÝYLLYGYNY BELLEÝÄR

Ýurdumyzyň iň baýry ýokary okuw mekdepleriniň biri bolan Türkmenabat şäherinde ýerleşýän Seýitnazar Seýdi adyndaky Türkmen döwlet mugallymçylyk institutynda birinji ýyl talyplarynyň 1050-si öz saýlan ugrundan bilim almaga girişdiler. Institutda hünär taýýarlygynyň 15-si boýunça geljekki mugallymlaryň 3300-den gowragy bilim alýar.

Amyderýanyň kenaryndaky mugallymçylyk instituty 1950-nji ýylda açyldy. Ýokary okuw mekdebi döredileni bäri bilim ulgamy üçin 50 müňden gowrak hünärmen täýýarlandy. Häzirki müňýyllykda bu ýerde daşary ýurtly raýatlara-da bilim almaga mümkinçilik döredildi. Mysal üçin, 2019-njy ýylda Owganystandan, Hytaýdan we Täjigistandan uçurymlaryň 22-si ýokary bilim hakda diplom aldylar.

Ýurduň innowasion ösüş ugry jähtinden bu ýerde bilim işine we hünär medeniýetini kemala getirmäge usulýet hem-de tehnologik täzeçilikler işjeň ornaşdyrylmagy netijesinde institutda dünýägaraýşy giň we işine döredijilikli çemeleşýän, kärine ussat mugallymlary taýýarlamak üçin ähli şertler döredilen.

Häzirki wagtda bu ýokary okuw mekdebiniň fakultetleriniň 5-sinde we kafedralarynyň 17-sinde talyplar tejribeli professor-mugallymar düzüminiň ýolbaşçylygynda hünär başarnyklarynyň ähli ugurlaryny özleşdirýärler. Institutda maglumatlar-kompýuter merkezi hereket edýär, auditoriýalar we laboratoriýalar multimediýa enjamlary hem-de orgtehnika bilen üpjün edilen, köpugurly kitaplar gory bolan giň okalga zally kitaphana talyplaryň ygtyýarynda.