TÜRKMENISTANYŇ FRANSIÝADAKY ILÇISI HALKARA ONLAÝN-DUŞUŞYGA GATNAŞDY

Türkmenistanyň Fransiýadaky ilçisi Şöhrat Jumaýew COVID-19 pandemiýasy şertlerinde Merkezi Aziýa döwletleriniň hyzmatdaşlygyna bagyşlanan onlaýn-duşuşyga gatnaşdy. Ony Fransiýanyň Ýewropada perspektiwalar we howpsuzlyk instituty gurady.

Wirtual pikir alyşmalara Merkezi Aziýa ýurtlarynyň Parižde ýerleşýän diplomatik wekilhanalarynyň ýolbaşçylary, Fransiýanyň Ýewropa we daşary işler ministrliginiň hem-de beýleki pudaklaýyn dolandyryş edaralarynyň, şeýle hem jemgyýetçiligiň we KHBS-niň wekilleri gatnaşdylar.

Türkmenistanyň diplomatik wekilhanasynyň ýolbaşçysy öz çykyşynda Türkmenistanyň Prezidenti Gurbanguly Berdimuhamedowyň Goşulyşmazlyk hereketiniň COVID-19 ýokanjyna garşy durmak boýunça Utgaşdyryjy toparynyň sanly wideoaragtanaşygy arkaly ýokary derejedäki duşuşygynda koronawirus ýokanjynyň ýaýramagyna garşy durmak babatda öňe süren halkara başlangyçlaryny jikme-jik beýan etdi. Ilçi Şöhrat Jumaýew Türkmenistanyň Hökümetiniň durmuşa geçiren toplumlaýyn çäreleri netijesinde ýurdumyzda COVID-19 keseliniň ýokuşan ýeke ýagdaýynyň hem hasaba alynmandygyna ünsi çekdi.

Şeýle hem diplomat onlaýn-duşuşyga gatnaşyjylary Türkmenistanda ýiti ýokanç keseline (COVID-19) garşy dessin çäre görmek üçin taýýarlygyň Meýilnamasynyň durmuşa geçirilişi bilen tanyşdyrdy, ol milli derejede halkara guramalary bilen hyzmatdaşlykda taýýarlanyldy. Nygtalşy ýaly, bu resminama Bütindünýä saglygy goraýyş guramasynyň maslahatlaryna laýyklykda işlenilip taýýarlanyldy.

Wirtual tegelek stola gatnaşanlara döwlet serhedindäki gözegçilik nokatlarynda, şol sanda Türkmenbaşy halkara deňiz portunda gurnalan zyýansyzlandyryş çäreleri barada habar berildi. Şeýle hem ýurdumyzyň ynsanperwer kömek hökmünde goňşy Eýrana we Owganystana lukmançylyk serişdelerini hem-de azyk önümlerini iberendigi bellenildi.

Türkmen Lideriniň başlangyjy bilen BMG-nyň Baş Assambleýasynyň «2021-nji ýyly Halkara parahatçylyk we ynanyşmak ýyly» diýip yglan etmek barada Rezolýusiýa kabul edendigini nygtap, ilçi Ş. Durdyýew onlaýn-duşuşyga gatnaşanlary şu ýylyň dekabrynda Aşgabatda geçiriljek «Bitaraplyk syýasaty we onuň halkara parahatçylygy, howpsuzlygy we durnukly ösüşi üpjün etmekdäki ähmiýeti» atly wekilçiliki foruma gatnaşmaga çagyrdy.